SURIANI @ Friendster

SALAWAS hidup di kuta, Palui tapaksa manyiwa, padahal siwa rumah di Banjar ini kadada nang murahnya, samunyaan larang-larang.

Maka cara pambayarannya wayah ini nang ampun rumah kada mau satahun atawa dua tahun sakaligus. Musti ditagih saban bulanan, supaya kawa manaikakan haraga siwaannya satiap kali batagihan.

“Urang sugih nang gawiannya manyiwakan rumah itu sama wan rentenir, hantu duit,” ujar Palui datang-datang pina gagarunum dan manyanyarik.

“Napa gagarunum Lui?” ujar Garbus.

“Naik pulang siwa rumahku, maka naiknya banyak banar. Rumahnya buruk haja, hatapnya miris dan parak wadah pambuangan sampah. Padahal, talu bulan nang lalu sudah dinaikakan jua, kuturuti haja dan wayahini naik pulang,” ujar Palui.

“Barapa tahun ikam badiam di situ dan handak pindah ka mana kalu kada hakun dinaikakan siwanya?” ujar Tulamak.

“Aku manyiwa di sana sudah talu tahun dan rasanya sudah cucuk karna parak wan gawian. Karna kada kawa manuruti siwa nang naik itu, sudah samingguan ini aku pindah tajauh sadikit ka kampung disubalahnya, masuk gang,” ujar Palui pina sadih.

“Sudah kusambat tadi bahwa hidup di kuta ini harus tahan sakit, harus wani basaing dan bila kada hakun mandarita bulik haja ka banua,” ujar Garbus.

“Napa dibawa itu Lui pina hibak bakantungan plastik,” ujar Tulamak marawa bawaan Palui.

“Hi’ih, napa dibawa Lui maka kaciuman baunya, babau masam, babau ratik sampah buruk,” ujar Garbus bapicik hidung.

“Aku mambawa kabiasaan ciciumanku,” ujar Palui.

“Ciciuman itu biasanya musti babau harum. Umpamaya, minyak harum atawa kambang, tapi kanapa maka ikam mambawa ratik buruk itu, bau masam,” ujar Tulamak manumpalak.

Palui tadiam mandangar ucapan Tulamak itu, lalu manjawab: “Tasarah aku haja karna inilah kabiasaanku,” ujar Palui mangarasi.

Rupanay salawas babarapa tahun Palui badiam di rumahnya nang tadahulu itu parak bak sampah TPA, maka inya tabiasa hari-hari dan siang malam mancium bau haruk. Karna kabiasaan mancium bau buruk itu lah, inya tapaksa basangu sakantungan ratik sampah nang sudah buruk salawas bapindah rumah. bpost/tam

Copyright © Banjarmasin Post