SURIANI @ Friendster

“Ujar habar bini ikam umpat bajualan wadai jua kah Lui?” ujar Garbus manakuni.

“Hi-ih, biniku bajualan itu bacari duit tambahan gasan ba-hari raya, gasan manukarakan baju kakanakan,” ujar Palui.

“Napa haja nang dijual Lui?” ujar Tulamak umpat manakuni.

“Macam-macam, ada wadai amparan tatak, putri salat, bingka kantang, bingka tapai, kue lam wan banyak lagi nang lainnya,” ujar Palui manjalasakan.

“Kalu nangkaya itu kami mahadang sisanya haja, sisa nang kada payu dijual Lui ai,” ujar Tulamak managuk liur.

“Matan partama bajualan samalam rasanya kada ada nang basisa atau balabihan, karna pasti habis tajual,” ujar Palui.

“Kada usah baulah alasan Lui ai, ikam jangan talalu engken barajut. Pasti ada haja lalabihannya, kada mungkin kadada,” ujar Garbus mangaramputakan.

“Ayu ja kalu bubuhan ikam tatap bakaras mamaksa, kaina malam imbah sambahyang tarawih ikam badua datang ka rumahku. Kaina ku surung sisanya, muhun supaya di langisakan,” ujar Palui bakalah.

Malamnya imbah tarawih bubuhannya bujuran bailang ka rumah Palui. Dikiyaunya Palui tapi nang ka luar bininya haja.

“Lakiku baluman bulik dari masigit. Amun bubuhan ikam hakun mahadang, hadangi haja paling kada lawas,” ujar bini Palui.

“Itu nah Paluinya hanyar cangul,” ujar Garbus manunjuk Palui nang handak baliung malihat bubuhannya.

“Lui…ui Palui. Handak bukah kamana ikam?” ujar Tulamak manyasah.”Aku kada nyaman wan bubuhan ikam karna hanya maninggali sisa,” ujar Palui.

“Kada apa-apa Lui ai, kami hakun haja daripada tabuang karna babasian,” ujar Garbus

“Iklas haja lah bubuhan ikam malangisakan?” ujar Palui manakuni.

“Kami badua iklas haja, tampulu parut galurukan imbah tarawih,” ujar Tulamak wan Garbus.

“Ayu ai kalu nangkaya itu, bubuhan ikam umpati aku ka dapur,” ujar Palui.

“Mana Lui wadainya? Kanapa maka ancak wan luyang rigat haja nang ada,” ujar Tulamak wan Garbus wayah sampai di dapur.

“Karna bubuhan ikam kada parcaya waktu kupadahakan kadada wadai nang kada payu atau balabihan, maka itu nah buktinya,” ujar Palui manunjuk luyang atau ancak wadai nang rigat nang balum dibasuh ulih bininya.

“Amun ikam batakun sisa, itu nah sisanya nang barikit di luyang, tulung langisiakan karna bubuhan ikam sudah bajanji,” ujar Palui tatawa sambil manjulung sabun wan abu gusuknya.

Bubuhan Garbus wan Tulamak tapaksa manggawiakan karna sudah tajanji biar sambil manyumpah dalam hati karna tapakalah ulih Palui. (ivd)

Copyright © Banjarmasin Post